Temu Sai Rio Gheta Tiwu Sora Gola Gagi: Tiwu Eo Pire Dapi Bhisa (Tugasoki-Ekoae)

Foto insert: Ana mamo Siga Rembu nebu rio leka tiwu Sora Gola Gagi

Pele pata ata du'a nosi:

Ulu diga eko bina, Pere sare one pawe.Nebo dau deka leka deko, eo raki dau ngoa rasi, we'e diga ngere nenu sina, we,e bara ngere pingga jawa. powo sai kopo, tena sai kasa, we'e nua mo'o tu'a keka mo'o maku.Kaju aje ma'e poka pate, we'e ule age ma'e rembu sawe, ki kapa ma'e jengi, kuru tu'u ma'e dutu, ola mbura nora sa gili ola, poka toa ma'e tau ngura luja, titi oto ma'e tiko wolo, ta'u kora bere tiko bege, melo mbebho tiko ela. Gaga bo'o kewi ae, nuwa kea nuwa kena, keta ngere kobe, ngga ngere leja...Pati ngai kita sia ngere leja Siga, rade kita mbara ngere wula ja.

Ola peta dela atau pele pata leka ata du'a welu, we tau na'u nena leka kita ana mamo, we'e jaga nua ola, kita mera leka nua, no kema leka ola..kita we ngai tei leka Ngga'e pati, no leka Du'a eo welu. Du'a gheta lulu wula, Ngga'e ghale wena tana..

Hubungan kai no'o ola tuli gheta, kami mo nosi leka ola jaga kita ghea Tiwo sora atau Ae Tiro Gola Gagi...

Ae Tiro Gola Gagi

Kita masa-masa ana mamo eo Siga Rembu, mera leka tana Ratewati.Nosi no'o ola jama eo maju sawe, Kita muri mera no hand phone eo bheni, ghala pera pati gamba Ae Tiro Gola Gagi we ata eo bebo tau mbe'o, terutama ana lo'o du'a ngara kita. Kami terima kasi bhondo leka ebe aji, eo deki dowa gharu nua Tugasoki tau gheta ulu ae..Ele si iwa ulu ae pu'u tapi, leka Ae Tiro gola Gagi gharu nebu na jadi dowa ulu ae tau minu ka no lau nua Tugasoki - Ekoae. 

Dema miu mbana no gheta nu'a ada, du gheta ulu Ae Tiro Gola Gagi kami rina leka dua ngara kita...kita jaga we ae ngala bersih we tau minu ka.Latu ola kema mbana kita tau rusa rasa ulu ae gharu antara lain:

Kita rio rasi leka one tiwu tiro atau tiwu sora Gola Gagi.Dema kita rio   rasi one tiwu berarti ae kebu dhemu.Ibarat ae eo rasi lima gha'i lima  Kita wiki tau pedhe nasu atau minu ka.

Kita eo ngonggo ngoa no kura, keba, ana mbo, mongga, kembi, kita gae pesa ka mbana ngoka soa dengan cara welu no'o oba..Ola meko Kema kita ghera na iwa bheni, tau rusa rasa lingkungan ae..jadi ae iwa bersi. Dema fonga mo pesa ka kura keba, kita soa, atau ngoka we, ndu leka ata du'a pera, embu welu mamo moi.

Leka eo tuli na aku iwa si mo jaga lara, oa penda atau bheri denda ebe aji, ka'e sa iwa, menga aku mo nosi we, we,e tana watu kita tu'a, ma'e tau ghura luja.Tana watu tu'a do du'a kita tau, iwa sa ata mangu lau laja ghawa sa iwa.Dema miu rasa ola nosi na molo, pera si leka aji Ka'e kita na..nosi mbe'o gare keku..Seru ma'e ria waka ma' e tu'a..we muri pawe kita sare, we kema kita gena ghewi kita sai..

Salam Ana Mamo Siga Rembu Ratewati.