Ngaji Rina Leka Leja Ka'o

VOXRATEWATI.Com. By Wara Cypriano

Happy Birtday 34th 26/12/2017

3+4= 2017
26/12/2017
Selamat Pesta St.Stefanus Martir 1 tapi namaku Siprianus seharusnya dirayakan 16 September..

Ngaji Rina Leka Leja Ka'o..

Aku more kau Ngga'e..naja Kau eo bhisa dedu Kau eo ria sa gili ola..Aku rina, pati aku umu bewa, nuwa kea nuwa kena.

Tipo ji'e pama pawe, Ola kema mbana, ola meko eo sala Kau pati ampo, ola pati, we nge bhondo beka kapa, peni nge wesi nuwa, kau pati aku ngai sia rade mbara, ngai sia ngere leja Siga, rade mbara ngere wula ja..Aku tabe, aku ngaji ola tonda no'o ate bea..

Leja ina Kau pati do aku ola muri leka Ine no'o ema, ine eo tau dhadhi, ema tau mesa...Aku bala talo ola bogo, ro, ndate, fe'a ola muri eo ebe tau paga no'o susa, kura duna..menga ebe mete, menga ebe sera leka lima kau Ngga'e..Kau mera gheta lulu wula..kau tama ghale wena tana eo pera leka kami no'o agama nasrani.

Oh Ngga'e..Kau sera do ana Kau eo mara, ana eo bhisa tau wale dosa kami leka dunia.Aku iwa gare bewa, aku iwa mbabho gajo..Aku peme, aku lele ola pera pati ndu leka ata du'a nebu mulu.Ola na'u nena, ola wenggo jejo, we pati aku mbe'o leka ine ema, keluarga, negara no'o gereja..

Ema Ngga'e, no,o ana ata kaki, no'o ngai santo, leja ina du limba leta...Aku more, tabe, pati aku leja eo ji'e..kobe eo sare..we lo ku ma'e ro, tebo ku ma'e baja...Aku rina pati aku muri bheni kiti mbale..Nggengge aku no'o fai, ana, eja eo ji'e ka'e eo pawe...aku sakola, aku kema tau dedu naja kau eo ria penga bewa sa gili ola..

Oh ine Maria..Ine eo mara nggaja, Ine eo sare pawe, lo Kau bheni tebo Kau masa eo bebas dosa asal..Kau tau tu tonda ola ngaji rina kami leka nia ana Kau eo mara Yesus Kristus.Kai eo ka'o leka kopo sapi, leka gana eo raki tau pera pati leka kami eo benu dosa no'o sala..Kami rina ngodho tau pati kami berka we kami ngala tonda no'o ola umu kami,tau welu leka fai no'o ana..

Oh Ngga'e..menga leja la'e mese..Aku rina ampo dosa, ola sala aku leka one ate aku, leka one keluarga terutama leka ema Ka'oku, ema aku eo mara, ema tau mesa, emaku Fransiskus Kota, Aku rina ampo salah dosa kai, we'e kai tama leka one sorga.Aku rina ampo ngeni eo tau salah leka imu sama, soli leka kau Ngga'e..Kema ku salah leka eo meko, Gare ku seso leka eo leko, ola piki ku eo raki..Aku sera walo leka Kau Ngga'e..we aku mbana leka jala eo masa, we leta leka wolo eo molo. Pati aku  gare bheni, nia ma'e tu'a, wangu ma'e wake..gare keku ate deso...Tau bheni leka keluarga no'o masyarakat leja ina du limba leta..Ngai naja ana Kau Yesus eo bhisa...Amen


Selamat Hari Raya Natal 2017 & Bahagia Tahun 2018 Bagi Sahabatku yang telah Membaca Doa ini..Damai Kristus Menerangi Kita Sekalian.